थांरौ साथो घणो सुहावै सा…

9.11.12

दीयाळी रा दिवटियां ! थां’री के औकात ?

रामराम सा !
धनतेरस , रूपचौदस , दीयाळी , गोरधन पूजन , भाईबीज
री मोकळी
शुभकामनावां ! मंगळकामनावां ! 

    
लिछमी नित आशीष दै , गणपति दै वरदान !
सुरसत-किरपा सूं बधै सदा आपरौ मान!!
 
दीयाळी हरख रौ उच्छब अर आणंद रौ तिंवार है 
पण संसार में सगळा जणा बडै भाग वाळा कोनीं हुवै
ऐ दूहा निरधन अर कमजोरां री दीठ सूं कह्योड़ा है

मूंघाई छाती चढी , ऊपर काळ-कराळ !
साम्हीं दीयाळी खड़ी ; सांवरियो रिछपाळ !! 
 
फेर दियाळी आयगी , करै दीनियो सोच !
किनको हाथां मांयलो , डगमग खावै गोच !!
 
जठै टंक रौ पीसतां’ रूध्या रैवै हाथ !
उछब दियाळी रौ बठै कैड़ो लिछमीनाथ ?!
 
एक मजूर्’यां नीं ; भळै मूंघाई विकराळ !
दीयाळी नैं जोर के ? …आवै सालूं-साल !!
 
कळझळ करतां जुग हुया , गया झुळकतां साल !
दीयाळी करसी किस्यी अबकी म्हांनै न्याल ?!
 
दिन-हफ्ता रो-रो’ कटै , जाय झींखतां साल !
दीयाळ्यां-होळ्यां करै के ठनठन गोपाळ ?!
 
मूंघा पाणी-बीजळी , रोटी-दाळ जंवार !
दीयाळी ! था’री किंयां करां मान-मनवार ?!
 
टाबरियां ; बागा नुंवा , टापरियै रै रंग !
दीयाळी ! तूं आयगी भळै करण नैं तंग ?!
 
दोरा-स्सोरा काटल्यां , म्है आडा दिन नाथ !
दीयाळी तो आवतां… होवै बाथमबाथ !!
 
हाडफोड़ मूंघ्यावड़ो , गळै मांयनैं सांस !
दीयाळी थळकण खड़ी ; काळजियै भारास !!
 
हे लिछमी मा ! स्यात तूं बैवै आंख्यां मींच !
भगतू रह्’यो अडीकतो , सेठ लेयग्यो खींच !!
 
म्हैल किरोड़ी रै मंड्या दीयाळी रा ठाठ !
तीबै फाट्या चींथड़ा सतियो ; टूटी खाट !!
 
ईं घर बीं घर क्यूं धर्’या दीयाळी दो रूप ?
ठूंड भर्’यो घर एक रौ , इक  रौ घांटो टूंप !!
 
दीयाळी रा दिवटियां ! थां’री के औकात ?
धुख-धुख’ गाळां जूण म्है ,सिळग-सिळग’ दिन-रात !!
 
लिछमी गणपत सुरसती , रिध-सिध इंद्र कुबेर !
मेटो म्हारै देश सूं भूख पाप अंधेर !!
-राजेन्द्र स्वर्णकार
©copyright by : Rajendra Swarnkar
 
fireworks-61 Animated GifDeepmala Ka Aalok (In Hindi)Deepmala Ka Aalok (In Hindi)fireworks-61 Animated Gif