थांरौ साथो घणो सुहावै सा…

12.5.14

जग खांडो , अर ढाल है मा !

मा ई मिंदर री मूरत

जग खांडो , अर ढाल है मा !
टाबर री रिछपाळ है मा !
जायोड़ां पर आयोड़ी
विपतां पर ज्यूं काळ है मा !
दुख-दरियाव उफणतो ; जग
वाळां आडी पाळ है मा !
मैण जिस्यो हिरदै कंवळो
फळ-फूलां री डाळ  है मा !
जग बेसुरियो बिन थारै
तूं लय अर सुर-ताल है मा !
बिरमा लाख कमाल कियो
सैंस्यूं गजब कमाल है मा !
लिछमी सुरसत अर दुरगा 
था'रा रूप विशाल है मा !
मा ई मिंदर री मूरत
अर पूजा रौ थाळ है मा ! 
जिण काळजियां तूं नीं ; बै
लूंठा निध कंगाल है मा !
न्याल ; जका मन सूं पूछै
- था'रो कांईं हाल है मा !
धन कुणसो था'सूं बधको ?
निरधन री टकसाल है मा !
राजेन्दर था'रै कारण 
आछो मालामाल है मा !
-राजेन्द्र स्वर्णकार
©copyright by : Rajendra Swarnkar

●●●●●●●●●●●●●●●●●●●●●

मां पर लिखी मेरी राजस्थानी ग़ज़ल के भावों तक आप अवश्य ही पहुंच पाए हैं , 
कुछ और गहराई से रचना की आत्मा का स्पर्श कर पाएं , 
इसलिए कठिन शब्दों के अर्थ प्रस्तुत हैं - 

खांडो = खड़्ग/ तलवार
रिछपाळ = रक्षक
विपतां = विपदाएं 
काळ = काल 
वाळां आडी पाळ = बाढ़ से उफनते नालों के लिए अस्थायी बांध
मैण = मोम 
हिरदै = हृदय 
कंवळो = कोमल
सैंस्यूं गजब = सबसे अद्भुत 
जिण काळजियां तूं नीं = जिन कलेजों में तू नहीं है
लूंठा निध = (वे)धनवान बेटे
न्याल = धन्य धन्य
था'रो कांईं हाल है मा != तुम्हारा क्या हाल है मां !
कुणसो = कौनसा 
बधको = बढ़कर
निरधन री टकसाल = निर्धन बेटे की टकसाल
था'रै कारण = तुम्हारे कारण 
आछो मालामाल = अच्छा मालदार
●●●●●●●●●●●●●●●●●●●●●
राम राम सा