ओळ्यूं मरुधर देश री

आपरी निज़र है सा

प्रवासी राजस्थान्यां खातर लिख्योड़ा म्हारा दूहा 

ओळ्यूं मरुधर देश री
रूह रमै रजथान में , देश-विदेशां देह !

भाषा भायां भोम सूं , दिन-दिन इधको नेम !!

जे आयो रजथान सूं ; रोहीड़ै रा फूल !

कीं माटी-कण दै म्हनैं ; मिटै बिजोगी-सूळ !!

सोनचिड़ी मरुदेश री ! कीं तो म्हासूं बोल !

माटी री वाणी सुणूं ... उठै काळजै छौळ !!

बाळपणो सुपनां-सज्यो , गुम्यो विदेशां आय !

रजथानी सूं प्रीत नित गाढ़ी हो'ती जाय !!

सुपनो आयो सोहणो , गयो नींद सूं जाग !

लाल-कसूंबल ओढणो , अर पचरंगिया पाग !!

बैठ्या हां परदेश में , घर री आवै याद !

राब  खीचड़ै  सोगरां-फोफळियां रौ स्वाद !!

धोरा मुळकै आंख में , मोर टहूकै कान !

मीठी बोली सांस में , वाऽऽ म्हारा रजथान !!

तीज मगरिया गोरबंद घूमर अर गणगोर !

नित-नित मन रै आंगणै , नाचै ओळ्यूं-मोर !!

ओळ्यूं मरुधर देश री , परदेशां जद आय !

मनड़ो चढ-चढ डागळै , रो-रो ' कुरजां गा'य !!

आपा'ळां नैं शोधतां , कंठ गया है सूख !

पग-पग पर 'जैरामजी' करता गांव में रूंख !!

महानगरां में पूछसी , कुण हिवड़ै रौ हाल ?

माटी साम्हीं आवती , करती सार-संभाळ !!

मिळण' रेत घर आवती , चढ़ बायरियै-पूठ !

भोम-बिजोग्यां-सायरो , वाणी इमरत-घूंट !!

बायरिया ! रजथान जा , ल्यादै थोड़ी  रेत !

जावूं जठै बिखेरद्'यूं , अर निपजाद्'यूं हेत !!

अळगा धोरा-झूंपड़्यां , खेत  रेत मनवार !

इक बोली कंठां बसी ; सांवरिया ! उपकार !!

राख बडेरां री रमी... जकै गांव, जिण श्हैर !

मालक ! राखे मोकळी उण धरती पर म्हैर !!

-राजेन्द्र स्वर्णकार

©copyright by : Rajendra Swarnkar

(दोन्यूं फोटू गूगल सूं साभार)

राजस्थान दिवस : अखी रैवो रजथान !

आज राजस्थान दिवस पर आप सबनैं

मोकळी बधाई अर मंगळकामनावां !

आपरी निज़र है सा 

राजस्थान री कीरत में लिख्योड़ा म्हारा दूहा 

अखी रैवो रजथान

कलम कीरती के करै ? गा’य गळो के गान ?

अणभै आणंद आतमा , रमी जकी रजथान !!

        

पून झुलावै पालणै , सुख संचारै रात !
धोरां बोलै मोरिया , अर मुळकै परभात !!       

      

भोर उगेरै भजन अर दादी पीसै धान !

पणघट पूगी गोरड़्यां ; जाग उठ्यो रजथान !!

 

पांवधोक ! जी’ता रैवो ! खम्मा ! रामीराम !

बंतळ कितरी फूठरी ! वाणी रा चितराम !!

              

रीतां-रितुवां मोवणी , सो’णा तीज-तिंवार !

हेज हेत हिंवळास सूं भींज्योड़ो व्यौहार !!

घूंघट-झाका घालती , गा’य गोरड़्यां गीत !

धुरपद गा’य बथूळिया , पून सजै संगीत !!

धरा पसेवो सींचता , करषा नद बैवाय !

रजथानी अभिमान सूं , इंदरदे’ शरमाय !!

काचर-फळी-मतीरिया, कैर-सांगरी, फोग !

राब, ढोकळा, चूरमो-बाटी राजसभोग !!
  
हींडा, मेळा-मगरिया, पणघट, हाट-बजार !
म्हांरै राजस्थान रा सुरग जिस्या सिणगार !!

    

गोबर-नीप्या झूंपड़ा ;सुरगलोक शरमाय 

मिनख-लुगाई मोवणा ,देवी-देव लजाय !! 

धोरां सागै कामणी-कुदरत राचै रास !

रसमस राजस्थान में जीवण रौ मधुमास !!

खींप खेजड़ी भुरट अर सेवण फोग ’र जाळ !

कुदरत मा ; रजथान री माटी करी निहाल !!

फुठरापो हद-मोवणो , भांत-भांत रस-रूप !

रेत रजत रजथान री , भाषा अमी सरूप !!

  

निसरै हुय रजथान सूं देव जणै भरमाय !

बिरमाजी कद औ सुरग बीजो दियो बणाय !!

   

दूधां न्हा , पूतां फळो ! अखी रैवो रजथान !

राजिंद री अरदास है… बधै सवायो मान !!

-राजेन्द्र स्वर्णकार

©copyright by : Rajendra Swarnkar

आज इण ब्लॉग ‘ओळ्यूं मरुधर देश री’ पैली बरस गांठ भी है सा …

आप सबरै सनेह सहयोग रौ म्हैं आभारी हूं ।

राजस्थानीभाषा और राजस्थान के प्रति

आशीर्वाद , स्नेह और शुभकामनाओं के लिए

मैं सभी अराजस्थानी मित्रों के प्रति हृदय से कृतज्ञ हूं 

(सगळा फोटू गूगल सर्च सूं साभार)