जय जय राजस्थान

राम राम सा 

राजस्थान दिवस

री 

मोकळी बधाई अर मंगळकामनावां !

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*

इण ब्लॉग पर आप सब रौ घणैमान स्वागत है सा !

आप सभी का यहां हार्दिक स्वागत है !

All of you are most welcome here .

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*

ओळ्यूं आपांरी जिनगाणी रौ घणो महताऊ भाव है । 

ओळ्यूं रा अरथ याद , स्मृति memory  या remembrance

सूं घणा बत्ता ( more ) अर ऊंडा (deep) है ।

इण ब्लॉग ओळ्यूं मरुधर देश री… पर 

संसार रा सगळा राजस्थानी भायां-बहनां रौ 

अंतस रै ऊंडै हेत-हिंवळास सागै घणैमान स्वागत है… 

भलां ई आप किणी प्रांत, किणी देश, किणी भूभाग पर बस्योड़ा हुवो। 

आपरौ जे सात पीढ़ी पैलां भी राजस्थान सूं समंध हो 

अर आपनैं आपरी माटी रै प्रति , आपरी मात-भाषा-बोली रै प्रति अपणायत अर लगाव री जाबक ई ललक अर हूंस लखावै , 

तो औ ब्लॉग आप खातर ई है सा ।

आप आपरी मन री बात अठै निधड़क कर सको ।

जद कद  भी मातभोम ( mother-land ) री गोदी री ओळ्यूं आवै , 

का (or) मातभाषा ( mother-tongue) री रळी आवै ;

आ’र बंतळ करो , कीं कैवो… कीं सुणो…

औ थांन आपरौ ई है सा ।

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*
आज माटी री वंदना रौ एक गीत

*जय जय राजस्थान*

सुरंग सुरीलो सोहणो , सुंदर सुरग समान ।

रढ़ियाळो रळियावणो , रूड़ो राजस्थान ॥

जय जय जय राजस्थान ! ओ म्हारा प्यारा रजथान !

ओ रूपाळा राजस्थान ! ओ रींझाळा राजस्थान !

बिरमाजी थावस  सूं  मांड्या ,  थारा  गौरव  गान !!

ओ रणबंका रजथान  !  ओ रंग रूड़ा राजस्थान !

ओ भुरजाळा राजस्थान !  ओ गरबीला राजस्थान !

गावै वीणा लियां सुरसती , थारा कीरत गान !!

लुळ लुळ' सूरज किरणां इण माटी रो माण बधावै सा

हाथ जोड़ियां आभो अपलक निरखै ; हुकम बजावै सा

मगन हुयोड़ो बायरियो कीरत में धुरपद गावै सा

नांव लियां ही मुरधर रो , मन गरब हरख भर जावै सा

कुदरत मा मूंढ़ै मुळकै !

हिवड़ां हेज हेत छळकै !!
मस्ती मुख मुख पर झळकै !!!
जय जय जय राजस्थान ! ओ म्हारा प्यारा रजथान !

इण माटी रौ कण कण तीरथ , सूरज , चांदो अर तारा

कळपतरू सै झाड़ बिरछ है ;  गंगा जमुना नद नाळा

धोरां धोरां अठै सुमेरू ;  मिनख लुगाई जस वाळा

शबदां शबदां में सुरसत ; कंठां कंठां इमरत धारा

मुरधर सगळां नैं मोवै !

इचरज देवां नैं होवै !!

स्सै इण रै साम्हीं जोवै !!!

जय जय जय राजस्थान ! ओ म्हारा प्यारा रजथान !

वीरां शूरां री धरती री निरवाळी पहचाण है

संत सत्यां भगतां कवियां री  लूंठी आण-बाण है

आ माटी मोत्यां रो समदर , अर हीरां री  खाण है

म्है माटी रा टाबरिया , म्हांनै इण पर अभिमान है

रुच रुच' इण रा जस गावां !

जस में आणंद रस पावां !!

मुरधर पर वारी जावां  !!!

जय जय जय राजस्थान ! ओ म्हारा प्यारा रजथान !

-राजेन्द्र स्वर्णकार

 ©copyright by : Rajendra Swarnkar

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*

~*~ अठै सुणो म्हारौ औ गीत ~*~

म्हारी बणायोड़ी धुन अर म्हारी ही आवाज में

खास आप वास्तै

(c)copyright by : Rajendra Swarnkar

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*

* अरथ अर भाव *

सुरंग = आनन्द-माधुर्य-प्रफुल्लता-प्रदायक , शुभ , सुंदर ,  शुभ्रवर्णी , सुशोभित 
सुरीलो = कर्णप्रिय मधुर स्वर वाला
सोहणो = शोभायमान , सुहावना
सुरग = स्वर्ग
रढ़ियाळो = अडिग आन बान वाला , जुझारू , पौरुषवान , दृढ़ प्रतिज्ञ , 
हठी , स्वाभिमानी , शक्तिशाली ,
रळियावणो = मोहक , आकर्षक , प्रिय जिससे मिलने से मन ही न भरे
रूड़ो = सर्वोत्तम , सर्वश्रेष्ठ , समर्थ , सक्षम , चरित्रवान ,
( ‘रढ़ियाळो’ और ‘रळियावणो’ तथा ‘रूड़ो’ शब्दों में इतने विराट व्यापक सकारात्मक अर्थ अंतर्निहित हैं कि व्याख्या का विस्तार बढ़ते ही रहने की संभावना है । और विडंबना देखिए , ‘रढ़ियाळो’ और ‘रळियावणो’ इन शब्दों का प्रयोग आम रचनाकार की तो छोड़िए , पिछले 20-25 वर्षों में इधर-उधर और अकादमियों से सम्मानित-पुरस्कृत रचनाकारों तक ने अपनी रचनाओं में नहीं किया ।  … मेरे ध्यान में तो नहीं आया । अफ़सोस , राजस्थानी के असंख्य RICH शब्दों का क्षरण और विलुप्तिकरण निरंतर होता जा रहा है …!)

***

आप सब तक मेरी रचना के भाव संप्रेषित हो सके , इसलिए इसका अर्थ प्रस्तुत है ।

***

ओ मेरे प्यारे राजस्थान ! तुम्हारी निरंतर जयजयकार हो ।

ओ मन मुग्ध कर देने वाले मनोहर राजस्थान  !

विधाता ने बहुत धैर्य , तल्लीनता और रुचि के साथ तुम्हारे गौरव-गान लिखे हैं ।

ओ भुजाओं के बलशाली योद्धा , ओ गर्वित राजस्थान !

ओ श्रेष्ठतम् रण-प्रवीण ! तुम्हें रंग हैं !

वीणा लिये हुए साक्षात् सरस्वती तुम्हारे कीर्ति-गान गा रही है ।

झुक-झुक कर सूर्य-किरणें राजस्थान की इस मिट्टी का मान बढ़ाती है ।

इसके आदेश की प्रतीक्षा में आसमान हाथ जोड़े हुए अपलक निहारता रहता है ।

आनन्दविभोर , ध्यानमग्न वायु के झोंके इसकी कीर्ति में ध्रुपद गाते रहते हैं ।

ऐसे मरुधर का नाम लेते ही मन में गर्व और हर्ष भर जाता है ।

प्रकृति यहां साक्षात् मुस्कुराती है ।

हृदय-हृदय में यहां अपनत्व और स्नेह छलकता है ।

संतुष्टि भरी मस्ती हर चेहरे पर दृष्टिगत होती है ।

ओ मेरे प्यारे राजस्थान ! तुम्हारी निरंतर जयजयकार हो ।

इस मिट्टी का कण-कण तीर्थ है , ज़र्रा-ज़र्रा सूर्य है , चांद है , सितारा है ।

यहां का हर पेड़ , हर झाड़ कल्पवृक्ष है । यहां के नदी-नाले गंगा हैं , यमुना हैं ।

यहां के रेतीले टीले सुमेरु पर्वत हैं । यहां के नर-नारी बहुत यशस्वी हैं ।

यहां शब्द-शब्द में सरस्वती और कंठ-कंठ में अमृत है ।

ऐसी मेरी मरुधरा सबको मोहित करती है ।

इसकी महिमा देख कर देवताओं को भी आश्चर्य होता है ।

हर कोई राजस्थान के प्रति ही आसक्त और आशान्वित है ।

ओ मेरे प्यारे राजस्थान ! तुम्हारी निरंतर जयजयकार हो ।

शूर-वीरों की इस धरती की सबसे अलग ही पहचान है ।

यहां संतों , सतियों , भक्तों , कवियों की जबरदस्त आन-बान है ।

यह मिट्टी मोतियों का सागर और हीरों की खान है ।

हम इस मिट्टी की संतान हैं , जिन्हें इस पर गर्व और अभिमान है ।

हमें इस मिट्टी का यशोगान प्रिय है

राजस्थान की स्तुति में हमें आनन्द और रस की प्राप्ति होती है ।

हम इस मरुभूमि पर न्यौछावर हैं ।

ओ मेरे प्यारे राजस्थान ! तुम्हारी निरंतर जयजयकार हो ।

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*

तो आज विदा री वेळा आयगी , भळै (again) मिलसां । 

अबै सीखड़ली दिरावो सा ।

आपरी प्रतिक्रियावां री घणी उडीक रैसी सा
जय राजस्थान 
जय राजस्थानी

*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*♥*